Intza Unanue Arruabarrenak  1996ko neguan eman zion hasiera musikaz beteriko bizitzari, Gipuzkoako kostaldean, Orion. 14 urte zituela, musika, bere jolas gogokoenetakoa izatetik, bidelagun izatera igaro zen 2011n hasi baitzuen ibilbide profesionala Benito Lertxundiren taldearen parte bihurtu zenean.

Urte luzez paper zati ezberdinetan bere sentimendu eta bizipenetatik sortutako letrak idazten ibili da, non amaituko zuten ere jakin gabe. 2018an, ordea, paper zatiak loratzen hasi ziren melodiekin nahastu eta kantu bihurtu zituenean. Bertan sortu zen intza. Bere errealitatetik aldentzen duen unibertso musikal paralelo bat.

Unibertso hori erakustera etorri zen, «Ilundu aurretik» Ep-arekin. Pop doinuen eskutik, baina oraindik soinu propioa aurkitzeko bidean.  Lan horri esker, Zarata Mondo Sonororen «2021eko demorik onenen» zerrendan izendatu zuten. 2021ean Gaztea Maketa Lehiaketako 20 artista aurre hautatuetako bat izan zen, eta urtebete geroago Kutxa Kultur Musika 2022 programan aukeratu zuten. 

Azken urte hauek musikalki hazteko eta bere bidea aurkitzen joateko balio izan diote, eta hori erakustera dator bere lehen LParekin, bere pentsamendu sakonenetan barneratzen gaituen 10 kantuz osatutako lan kontzeptuala den «Aheri» lanarekin .